آمریکا کونکرهسینده تورکیه-ارمنیستان پروژهسی
آمریکا کونکرهسینه،
پرزیدنت باراک اوبامانی "تورکیه-ارمنیستان مناسیبتلرینین، عدالتلی،
مثبت، ثابت و دایمی ایستیقامتده ایرهلیلمهسینه دؤنوک ایشه چاغیران" قرار
پروژهسی تقدیم ائدیلدی.
نمایندهلر مجلیسی جمهوریتچی پارتی تکزاس عضوو
پیت سشنزین ایسپونسور اولدوغو "H.RES.226" نؤمرهلی پروژه، نمایندهلر
مجلیسی خاریجی علاقهلر کومیتهسینه گؤندریلدی.
"اوباما رهبرلیگینین
2009-جی ایلدن بو یانا تورکیه ایله ارمنیستان آراسینداکی ایلیشکیلری
اینکیشاف آختاریشیندا اولدوغو" ایفاده قانوندا،
"اوبامانین، او ایل،
ایکی اؤلکه آراسینداکی دیالوگون 'قیسا زاماندا میوهلرینی وئرمهسینی
گؤزلدیگینی ایفاده ائتدیگی، اما دیپلوماتیک علاقهلرین یئنیدن قورولماسینا
ایستیقامتلی یاخین زامانداکی تلاشلارین اوغورسوز اولدوغو" قید ائدیلدی.
بو
نقطهده قانوندا، موضوعنون حلّی اوچون آمریکا پرزیدنت باراک اوبامایا،
"تورکیه-ارمنیستان مناسیبتلرینین، گلهجک 100 ایلده، ایکی اؤلکهنین
اورتاق ماراقلاری آمریکانین بؤلگهدکی اهمیتلی گوونلیک ماراقلارینا
سؤیکنن عدالتلی، مثبت، ثابت و دایمی ایستیقامتده ایرهلیلمهسینه
چالیشماسی" چاغیریشی ائدیلدی.
ترققی اوچون تورک انستیتوسو باشقانی دریا
داشقین، ائتدیگی یازیلی آچیقلامادا، "تورک-ارمنی مناسیبتلرینین گلهجگینه
قاتقی تامین ائدهجگی دوشونولهرک کونکرهیه تقدیم ائدیلن یئنی تکلیفی
دستکلدیگینی" قید ائتدی.
انستیتوسون مصلحت هیاتی عضوو و اسکی تکزاس میللت وکیلی سولومون اورتیز ده،
"ایلک
دفعه تورک-ارمنی مناسیبتلرینین گهجگینه یؤنلمیش بیر پروژه تقدیم
ائدیلدی و اومید ائدیرم کی کونکرهدکی بوتون اسکی ایش یولداشلاریم بو
اهمیتلی لاییحهنی دستکلییرلر" ایفادهسینی ایستیفاده ائتدی.
داها اوّل
ده جمهوریتچی پارتی فلوریدا میللت وکیلی کورت کلاوسون، کونکرهیه تقدیم
ائدیلمک عذره، تورکیه-ارمنیستان علاقهلرینین نورماللاشدیریلماسی
موضوعسوندا اوبامایا مراجعت ائدیلن قرار پروژهسی حاضیرلامیشدی. قانوندا،
اوبامایا 1915 حادثهلرینین "طرفسیز، مثبت و قالیجی تورک-ارمنیستان
علاقهلری ایستیقامتینده اله آلینماسی اوچون وظیفه گوجو میدانا گتیرمهسی"
تکلیف ائدیلمیشدی.