+0 به یه ن

یازار:@aydinliq

هر بیر قونودا، او قونونون اوزمانلاری و فعاللاری نظر صاحیبی حساب اولونارلار. تخصص صاحیبی اولمایانلار و او قونودا فعال اولمایانلارین گؤروشلری اکثرا خام، شعاری و غیری دقیق اولماقلا بیرگه، احاطه سیز اولدوغو اوچون سورون یارادار. بیر میلتین طالعیی و ایزله یه جه یی یول و استراتئژی سی او قدر اؤنملی دیر کی بئله شئیلری اوزمان اولمایان لارا بوراخماق، ان یالنیش ایش حساب اولونا بیلر. بونا گوره ده جیدی و تاثیرلی چالیشیقلار اوچون جیدی و اوزمان چالیشانلارا احتیاج واردیر. بیر سیرا عمومی، دقیق اولمایان و اوزه یسل سؤزلری و یا ادعالاری تمل قبول ائده رک یولا چیخماق، سونوجدا یا پوپولیزمه یادا مغلوبیته میلتی گتیریب چیخاردا بیلر. آزربایجان اؤز آیاغی اوستونده دورماق ایسته ییرسه و بیر اولوس کیمی یاخشی بیر شرایط اؤزونه قورماق ایسته ییرسه، هر بیر فیکری_علمی ساحه ده اؤز اوزمان گوجونو و کادرینی یاراتماسی شرط دیر. بونا ایسه وطنینی_میلتینی سئون و بو یولدا فداکارجاسینا عؤمرونو صرف ائدیب تخصص قازانان اینسانلار لازیمدیر. یوخسا هر بیر قونویا سطحی و فرمانی شکیلده بیر_ایکی جمله قورماقلا، مسئله حل اولونمور. ذاتا گلیشمیش و گلیشمه میش اؤلکه لرین فرقلریندن بیری ده اوزمانلارین اولوب، اولماماسی، اوزمانلارین کیفیت لری و بو اوزمانلارین دوشونجه و آراشدیرمالارینین توپلوم /سیستئم طرفیندن منیمسه نیب حیاتا کئچمه سینده دیر. بو گونکی دونیادا یاشام و چالیشماق ساحه لری چوخ شاخه لی و چوخ یؤنلودور و بوتون بو شاخه و یؤنلره، تانیش و اوزمان اینسانلارین اولمالاری و اونلارین چالیشما و آراشدیرمالارینین جیدیه آلینماسی چوخ اؤنملی دیر. بو چالیشمالارا سایغی و بو چالیشمالارین اؤنمینی درک ائتمک و اونلاردان فایدالانماق ایسه هر بیر وطن سئور و میلت سئورین گؤره وی دیر. قایناق//https://telegram.me/aydinliq