+0 به یه ن

بیلیجی ائشک دونیادا خالق اویکوسو اولان بو پیئسی ، استانبول تورکجه سیندن کوچوروپ  ، اویارلاییب آذربایجانین تئاتر اوخویان اؤیرنیلرینه سونورام .  اویونجولار : اکینچی – اؤکوز – ائشک – ایت – ایکی ایشچی بیرنجی پرده .  ( آرخا پلاندا داغلار ، تپه لر و آغجلارین اولدوغو ییر رسیم ، یئر آلیبدیر . اکینچی بیر بو جاغدا اوتوروب ، سوفراسینی یئره سریب ، یئمک یئیر . بیر یانیندا سو کوزه سی دایانیب . آرخاسیندا کورهک وبئل  واردیر. اویاندا ائشک واؤکوز یان یانا اوتلاییرلار. هردن باشلارینی قالدیریب بیربیرینه باخیر لار. اکینچی گوله رک اونلارا باخیر . اکینچی باشینا شاپو قویوبدور . سوواری (نیظامی) پانتالون ویئله ک گئییبدیر . آیاغیندا دری چکمه لر واردیر . اؤکوز ، ائشک و ایت ساده بیر ماسکه ایله سئچیلیر لر) اؤکوز (شیکایت ائدرک ) : سن بوتون گون دورمادان چالیشمانین ، نه ایچین اولدوغونو بیلیرسن می ؟ یالنیز اوتلاری آغز یما آلیرام ، هئچ بیرازدا جانیما سینمیر .  (ائشک مارقلا) : نییه ؟؟ اؤکوز(بیراز سنیرلی ) : نییه ه ه ؟ دای ایستیر سن نه اولا ؟ تارلا سورولور بیزیم بوینو موزدا ، یوک داشینیر بیزیم بوینو موزدا . دال با دال وئریرلر . جوراتین وار گؤرمه . آجیب سوسؤزوبسان  می  دئییرلر ؟ بیلیرسن ایندیه کیمی هئچ دویاد ویا یئمک یئدیییم یادیما گلمیر، همشه سنن آرتیق قالانلاری یئیه رم !  ایت : هاف ...هاف ...هاف اؤکوز : یاسن ! نه ائدیرسن یولداش ؟ صبحدن آخشاما طؤله ده یاتیرسان . ایه میزین نئجه اوره یین اله گتیر مه یینده یاخچی باجارسان ِِِ...ایش گؤرمدن یئمک یئیه بیلدیینه گؤره چوخ راحاتسان؛ چوخ .  ائشک (گوُله رک ) وای ... وای منیم یازیق قارداشیم ؛ یامان اوُره ییم  سنه یاندی . ایندی قولاغلارینی شهله ودئدیکلریمه قولاق آس .  اؤکوٌز: دئه گؤروم نه دیه جکسن ؟  ائشک : باخ بورا ! سنی آپارماق ایچینگلدیکلری زامان آماندیر یئردن قالخما > نه قدر ووُروب  دؤیسَلر هئچ دَبرمه !  اؤکوٌز (مارقلا ): چوخ گؤزل . آما سینیر لانسلار  نه یاپیم ؟  ائشک : جانیم بیراز دؤزجکسن . هئچ بیر شئی راحات دییلدیر . گؤزلرینی باغلا ؛ هئچ نه یئمه . سودا ایچمه .   اؤکوٌز:اِ اِ اِ ؟ ائشک : اِ جانی ! بیله داورانسان ایش گؤرمَکدن  جانین قور تاراجاق . بیر نئچه گون راحات یاتیب کئفینه باخارسان.  اکینچی (اؤز اؤزوٌنه  گوله رک ) : آی یارامازلار ، هئچ بیلینمیر نییه آتیلیب دوشورلر!.... ایکینجی پرده .  (صحنه یه اینجه  بیر ایشیق  وئر یلیر. طؤله دئکورو جور لانیر . ساری رنگلی کاغیذ لاری قیر ماغلا ، قوروموُش اوتلاری جورلا ماق اولار . کوره ک و سوپرگه بیر بوجاغا قویولوب . اؤکوُز و ائشک یولارا باغلانیب ، اوتلارین اوُستُوندا یاتیبلار . گؤزلری باغلیدیر . ائشیکدن خُوروز سسی گَلیر . بو سیرادا ایشچی لر طؤیله یه گیریرلر ) بیرینجی صحنه.  ( ایشچی لر جیرق میرق پالتار گئییب لر . آیاقلاریندا قالوش واردیر ، باشلاریندا پاپاق) .  بیر ینجی ایشچی . دور گؤروم منیم قو جا اؤکوُزوم ! دور . بو قدر یاتماق یئتر . ایندی چلیشما زامانیدیر . (سونرا حیوانا بیر ایکی شاپالاق گئیدیریر . ) بیرینجی ایشچی . تئز اوُل قاللخ آیاغا دئدیم . کؤپک اوغلو کؤپک نه قدر آنلاماز حیوانسان سن ! ایکینجی ایشچی (سینیرلی ) : دییه سن دورماق ایستمیرسن ؛ منه وئرن ا.... سنه وئرن ا... . (آیاغیلا اؤکوُزه بیر تپیک وورور . اؤکوُز زاریلدامایا باشلیر. ) بیرنجی ایشچی : وورما وورما دییه سن آزار توتوب ؛ زار زار یلدیر یازیق . ایکینجی ایشچی : اوندا بئله اولسا تئز آقایا دییه ک ، گؤره ک باشیمیزه هارانین داشینی سالاجاییز .  بیر ینجی ایشچی : یاخچی ؛ اوندا سن آت کیمین قاچ خبر وئر ! (ایکینجی ایشچی سرعتله گئدیر . بیرینجی ایشچی سوپورگه نی الینه آلیب قیر وئره رک طؤلله نی تمیز لمیه باشلیر ) بیرینجی ایشچی : هی بونلارا باخ ! نه راحات یاتیبلار .  ائشک (یاواشجا) : باخسانا دردی تک سن دییل سن .  اؤکوُز : آی تانریا قوربان اولوم > بودا بیزی درد سیز سانیر. بَیه راحات راحات یاتمیشیز ؟ بیز نه هایدا ، او نه هایدا ! ائشک : دوغرو دییرسن وا... . ایشلری گوجلری بیزی تاپداماغدیر . آجیقلارین بیزدن چیخیر لار .  اؤکوُز : نه ائلیه ک یو داش الیمیز دان بیر ایش گلمیر کی .  (بو آرادا ایکینجی ایشچی طؤله یه توللانیر) ایکینجی ایشچی ( یورغون) : اوووف . جانیم چیخدی  وا ... بیرینجی ایشچی : نه ائده جیز ایندی ؟ سوروشدون ؟  ایکینجی ایشچی : "اؤکوُزو آلیز وورسا ، ائشه یی گوندرین ایشه " ، دئدی .  ائشک (آغلارکن ) نه ه ه ه ! ( آنقیرمایا باشلیر ): آ عی ...آ عی ... بیرینجی ایشچی (گوله رک ) : باخا ! ائشیتدی دییه سن . گؤر نه آنقیریر !  (ایشچیلر گولو شوللر . بیر ایشچی ائشه یین یولارینی آچیب ،چکمه یه باشلیر ) بیرینجی ایشجی : گَل قوجا قولاق . بو گون ده ده نی یاندیراجایام ! ایکینجی ایشچی :تئز اوٌل  . تنبل حیوان . ائشک (آجی آجی آرتیریر ) : آ عی ..آ عی ... ( ائشک استمیه ایستمیه یئریر) . (صحنه قارالیر) ایکینجی پرده. (صحنه یاواش یاواش آیدینلاشیر. اؤکوُزطؤله ده کئفلی کئفلی یاتماغدادیر) . اؤکوُز : نه  قدر شیرین اولارمیش یاتماق ! یئییب ایچیب ، یاتیرام . بوندان یاخچی بیی لیک اولار می ؟(گؤر بیر سسله ) موووو... ( بو سیرادا بیرینجی ایشچی ائشه یی گتیریب بندیندا باغلیر . ائشک یورغون بیر دورومدادیر. ایشچی طؤله دن چیخیر . ائشک اؤزونو یئره آتیر) .  ائشک آه ه ه . اوف ف ف . آیغلاریم ، بود لاریم ، هر یانیم آغریر . وای ده ده ، گؤر اؤزرمو نئجه گودازا سالدیم آ . اؤکوُز : نه اولوب یولداش ؟ بو نه حالدیر سنده ؟ شیپیر شیپیر تر داملاییر هر یانیندان ..  ( ائشک باشینی قالدیریب سینیرلنه  سینیر لنه باخیر . یئنه باشینی یئره سالیر ) اؤکوُز : نه اولدو ؟ دییه سن ایشتمک چتین گلیب سنه ؟ چوخ یورولوبسان ؟ ( ائشک بو دؤنه باشینی تئز قالدیریر) ائشک : آی منیم قارداشیم . کاش ائله یورولماق اولوردی . یورولماغا چاره وار ( اغلایارکن ) آما دوغرو سو منی اؤزه ن باشقا بیر شئی دیر .  اؤکوز: نه دی او ؟ دئه گؤورم . آغلامایا نا پپه یوخدو آ. دئه جانیم . ائشک (باشینی توولایاراق ) :سنه بیر سئری اؤیوت وئردیم ، اسیر لیکدن جانین قورتاردی بونان. اؤکوز (حیرتله ) : وی ی ی ! بونون اؤزوُلمه  یی وار ؟ ائشک ( آلدادا آلدادا ): هله دییه ر سن دای . سنده بیلسه یدین منیم اوٌره ییمده اولانی ...هی هی هی  اؤکوُز : دئه گؤورم. اوره ییم دوشدو شالواریما . آچ او مصب سیز اوره یینی آچ ! ائشک : بو گون  صا حیبیمیزین ایشچلرله دانیشماسنا قولاق آسدیم . اؤکوز ( مارقلا ): نه دییر دیلر؟ ائشک : " اؤکوز ایه یاخچی لاشما سا ، اونو ساتین گئدسین " دئییردی.  اؤکوز ( شاشقین): نه ه ه  ؟ نه دئدین ؟ نه دئدین ؟ ائشک : ای ی یولداش سنین ایشین  یامان پیتداشییب ! یاخیندا ساتیلاجاغین ایچین چوخ اؤزولورم . آنلادین می ایندی ، نییه پریشان حالدا اولوغومو ؟ اؤکوز( اؤز اؤزوٌنه دانیشیر) : نئجه اولار ؟ منی نییه ساتیر لار؟  یوخ ...یوخ  ، بو نا ایمکان یوخ . (یئریندن قالخیب ؛ هیزلی آدد یملار لا فیر لانماغا باشلیر) . اؤکوز: دوغرودان ساتماغا آپارسالارسا نه یا پا جایام ؟  ائشک : سنه یاردیم ائده مه یه جه ییم ایچین منی باغیشلا ، نه ائله ییم سنین یئرینه ساتیلماغدا گئده بیلمه رم آخی .  ( اؤکوز اؤزونو ایتیره رک ائشه یین یانینا گئدیر) اؤکوز (یالوارارق ): یولداش نه اولار ، بیر داها او آغلینی ایشه سال جانیمی یی جو قور تار دای ! ائشک (آلداراراق ) : نه یاپا جاییمیزی بیلمیرم آخی . سونرا فیکره گئدیر . ائشک بیردن اؤزونو آغلینا بیر شئی گلمیش کیمی گؤستریر و آیا غا قالخیر) ائشک : دور باخالیم . آغلیما پارلاق بیسر فیکیر ساچدی . اؤکوز (ماراقلا) نه دیر او ؟ تئز سؤیلهَ  قارداش . ائشک : ایندی یئم گتیره جکلر .  اؤکوز : پی ی ی  ائشک: اونون هامیسینی یئه . سویوندا ایچ . سسینی بیراز یوکسلت .نئشه لی نئشه لی باغیر . دور بورجوت اؤزو نو وور اوتای بو تایا ! بئلده سنین ساغلاملیغینی گؤروب ساتماغیندان واز کئچر لر . سنده یئنه قاباقکی کیمی ایشینه گئدر سن . نئجه دی ؟ اؤکوز : هه ...هه ... آغزینا قوربان اولوم . هامسینی گؤره رم.  (او آرادا قا پی آچیلیر بیرینجی ایشچی ایچری گیریر. الینده یئم دولو بیر قاب وبیر سو سطیلی واردیر. بو نلاری اؤکوزون قاباغینا قویور. ) بیرینجی ایشچی : بو نو دا یئمه سن . قلانین اؤزون بیلرسن (گوله رک ) . دای اتینی قصابدا تاپما لیسان. بیرینجی  ایشچی ائشیه چیخیر .صحنه قارالیر سونرا یئنه آچیلیر. ائشیکدن ایت آوو لتو سو و خُوروز سسی گلیر . ائشک یاتیب . اؤکوز آیاغا قالخیب ؛ سیلکلنیر . سونرا گؤر ییر سسله مومو ائلمیه باشلیر . ائشه یی ده او یادیر) ائشک (سینیرلی ) ظا لیم اوغلو ظالیم دئدیم باغیر اما بو قدر دای دئمدیم آخی صاباحین بو سا عاتیندا ائشک اویاداللار بَیه م .  ( قاپی آچیلیر . ایشچیلر ایچری گیریر) ایکینجی ایشچی : اووو بیزیم قوجا اؤکوز آیاق آچیب باخسانا! بیرینجی ایشچی : دونن دئدیکلریمی آنلادی دییه سن . آنلایانی دای قصابا آپار مازلار! ( ایکیسسیده گولو شورلر ) ایکینجی ایشچی : گل گؤزلیم ... یاتماق یامان یاپیشیب دییه سن . بئله دییل می ؟ هه چورک الدن  سو گؤلدن !   بیرینجی ایشچی : ایشلمه ینه چوره ک وارمی ؟ اؤکوز : مووو..مووو. قاباقداندا چوخ آرتیق  ایشلَیه جه یَم ایندی !  ( طؤله دن چیخیر لار . ائشک سئییر چیلره دونور )  ائشک (اؤیوت وئره جه سینه ) : سیز سیز اولاسیز دای کیمسه نین ایشینه بورنوزو سوخمایاسیز !  (پرده باغلانیر)       9